ബേബി ജോൺ മെമ്മോറിയൽ ഗവൺമെന്റ് കോളേജ് ചവറ, 1981 ഓഗസ്റ്റ് 26 ന് കേരള ഗവൺമെന്റ് സ്ഥാപിച്ചതാണ്. കോളേജ് കേരള സർവകലാശാലയുമായി അഫിലിയേറ്റ് ചെയ്തിട്ടുണ്ട്. ചവറയിലെയും പരിസര പ്രദേശങ്ങളിലെയും നാട്ടുകാരുടെ ഏറെക്കാലത്തെ സ്വപ്നങ്ങളാണ് കോളേജ് സാക്ഷാത്കരിക്കുന്നത്. കേരള ഗവൺമെന്റിന്റെ കൊളീജിയറ്റ് എജ്യുക്കേഷൻ ഡിപ്പാർട്ട്‌മെന്റ് ആണ് കോളേജ് നിയന്ത്രിക്കുന്നതും പ്രവർത്തനം നടത്തുന്നതും. 1956-ലെ യു.ജി.സി. നിയമത്തിന്റെ 2(എഫ്), 12(ബി) കീഴിൽ യൂണിവേഴ്‌സിറ്റി ഗ്രാന്റ് കമ്മീഷൻ അംഗീകരിച്ചതുമാണ്. മത്സ്യബന്ധനത്തിലൂടെയും പരമ്പരാഗത കയർ വ്യവസായത്തിലൂടെയും ഉപജീവനം തേടാൻ നിർബന്ധിതരാകുന്ന യുവതലമുറയെ അവരുടെ സാമൂഹികവും വിദ്യാഭ്യാസപരവുമായ പിന്നോക്കാവസ്ഥയിൽ നിന്ന് ഉയർത്തുക എന്നതാണ് കോളേജിന്റെ ലക്ഷ്യം.

അഷ്ടമുടിക്കായലിന്റെ പടിഞ്ഞാറൻ തീരത്ത്, അറബിക്കടലിന്റെ കിഴക്കൻ തീരത്തും, കൊല്ലം സിറ്റിയിൽ നിന്ന് 14 കിലോമീറ്റർ വടക്കും, ദേശീയ പാത 47 ന്റെ വശത്തുമായി കൊല്ലം ജില്ലയിൽ ഉന്നതവിദ്യാഭ്യാസരംഗത്ത് 39 വർഷങ്ങളുടെ സേവനം പൂർത്തിയാക്കി, ആറ് ഏക്കർ വിസ്തൃതിയോടെ ശങ്കരമംഗലം എന്ന സ്ഥലത്ത് ക്യാമ്പസ് സ്ഥിതി ചെയ്യുന്നു. മുൻ ബഹു: കേരള മന്ത്രി ശ്രീ. ബേബി ജോണിന്റെ നിരന്തര പരിശ്രമത്തെ തുടർന്നാണ് ഗവൺമെന്റ് ഹൈസ്കൂൾ ഫോർ ഗേൾസ് ചവറയുടെ ഉടമസ്ഥതയിലുള്ള താൽക്കാലിക കെട്ടിടത്തിൽ നാല് പ്രീ-ഡിഗ്രി കോഴ്‌സ് ബാച്ചുകളോടെ 400 വിദ്യാർത്ഥികളുള്ള ഈ സ്ഥാപനം പ്രവർത്തനമാരംഭിച്ചത്. കോളേജിന്റെ ആദ്യ കെട്ടിടത്തിന്റെ നിർമ്മാണം പൂർത്തിയാക്കി ഔപചാരികമായി ഉദ്ഘാടനം 2006 ജൂൺ 17 തീയതിയിൽ ബഹു: മന്ത്രി ശ്രീ. പ്രേമചന്ദ്രൻ നിർവ്വഹിച്ചു. രണ്ടാമത്തെ കെട്ടിടം ഉദ്ഘാടനം ചെയ്തത് ബഹു: മുഖ്യമന്ത്രി ശ്രീ. വി.എസ്. അച്യുതാനന്ദൻ ആയിരുന്നു. നിലവിൽ 7 പ്രധാന ഡിപ്പാർട്ട്‌മെന്റുകളുള്ള (3 പി.ജി., 8 യു.ജി. പ്രോഗ്രാമുകളുള്ള) കോളേജ് ചവറയ്ക്കും കരുനാഗപ്പള്ളിക്കും ചുറ്റുമുള്ള ഹയർ സെക്കൻഡറി സ്കൂളുകളിൽ നിന്ന് പുറത്തുവരുന്ന നൂറുകണക്കിന് വിദ്യാർത്ഥികൾക്ക് പഠനത്തിന്റെ മരുപ്പച്ചയാണ്.