കേരള ഗവൺമെന്റിന്റെ കൊച്ചിൻ യൂണിവേഴ്സിറ്റി ആക്ട് 1971 പ്രകാരം “യൂണിവേഴ്സിറ്റി ഓഫ് കൊച്ചിൻ” എന്ന പേരിൽ 1971 ജൂലൈ 10ന് സ്ഥാപിതമായ സർവ്വകലാശാലയെ, 1986 ഫെബ്രുവരിയിൽ “കൊച്ചി ശാസ്ത്ര സാങ്കേതിക സർവകലാശാല (കുസാറ്റ്)” ആയി പുനർനാമകരണം ചെയ്തു. അപ്ലൈഡ്‌ സയൻസ്, ടെക്നോളജി, ഇൻഡസ്ട്രി, കോമേഴ്‌സ്, മാനേജ്മെന്റ്, സോഷ്യൽ സയൻസ് എന്നിവയിൽ ബിരുദാനന്തര ബിരുദ പഠനത്തിനും ഗവേഷണത്തിനും ഊന്നൽ നൽകുന്നതിനുള്ള ലക്ഷ്യത്തോടെയാണ് സർവ്വകലാശാല പ്രവർത്തിക്കുന്നത്. കുസാറ്റ് ഇപ്പോൾ ഒരു ലോക റാങ്കിംഗ് സർവ്വകലാശാലയാണ്. 2017 മുതൽ തുടർച്ചയായി ടൈംസ് ഹയർ എഡ്യൂക്കേഷൻ പ്രസിദ്ധീകരിക്കുന്ന ലോക റാങ്കിങ്ങിൽ കുസാറ്റ് മികച്ച സ്ഥാനം നേടി. ലോകമെമ്പാടുമുള്ള 1500 മികച്ച സർവ്വകലാശാലകളെ റാങ്കിംഗ് ചെയ്യുന്ന ടൈംസ്, ഇന്ത്യയിലെ 967 സർവ്വകലാശാലകളിൽ നിന്നും തിരഞ്ഞെടുത്ത 60 മികച്ച സർവ്വകലാശാലകളിൽ ഒന്നാണ് കുസാറ്റ്. കൂടാതെ QS വേൾഡ് യൂണിവേഴ്സിറ്റി റാങ്കിങ്ങിലും ഇൻഡ്യാ ഗവണ്മെന്റിന്റെ “നാഷണൽ ഇന്സ്ടിട്യൂഷണൽ റാങ്കിങ് ഫ്രെയിംവർക്കിന്റെ (NIRF)” റാങ്കിങ്ങിലും (റാങ്ക് -37) സർവ്വകലാശാല മികച്ച സ്ഥാനം നേടി.