ഫാറൂഖ് കോളേജ് ആരംഭിക്കുന്ന സമയത്ത് മദ്രാസ് സർവകലാശാലയുമായി അഫിലിയേറ്റ് ചെയ്ത, മലബാറിലെ ഏക ഫസ്റ്റ് ഗ്രേഡ് കോളേജയിരുന്നു. 1957-ൽ കേരള സർവകലാശാലയുടെയും 1968-ൽ കാലിക്കറ്റ് സർവകലാശാലയുടെയും കീഴിലായി. കോളേജിൽ 22 ബിരുദ, 16 ബിരുദാനന്തര ബിരുദ പ്രോഗ്രാമുകളും 11 പി.ജി. അംഗീകൃത ഗവേഷണ കേന്ദ്രങ്ങളിൽ പി എച്ച് ഡി പ്രോഗ്രാമുകളുമുണ്ട്. കോളേജിന് NAAC പുനർ-അക്രഡിറ്റേഷൻ A+ ഗ്രേഡ് (CGPA 3.51) ലഭിച്ചു.

കേരള സർക്കാരിന്റെ ഏറ്റവും മികച്ച സ്പെഷ്യൽ ഗ്രേഡ് (പ്രൈവറ്റ്) കോളേജിനുള്ള ആർ.ശങ്കർ അവാർഡ് രണ്ട് വർഷം ഈ കോളേജിന് ലഭിച്ചു, കാലിക്കറ്റ് സർവ്വകലാശാലയ്ക്ക് കീഴിൽ ഈ പദവി ലഭിക്കുന്ന ആദ്യ കോളേജാണ്. മികവിന് സാധ്യതയുള്ള കോളേജായി യു.ജി.സി. ഈ കോളേജിനെ തിരഞ്ഞെടുത്തു. കേന്ദ്ര സർക്കാരിന്റെ സാമൂഹ്യനീതി, ശാക്തീകരണ മന്ത്രാലയത്തിന് കീഴിൽ ന്യൂഡൽഹിയിലെ മൗലാന ആസാദ് എജ്യുക്കേഷൻ ഫൗണ്ടേഷൻ വിദ്യാഭ്യാസപരമായി പിന്നോക്കം നിൽക്കുന്ന ന്യൂനപക്ഷങ്ങൾക്കിടയിൽ വിദ്യാഭ്യാസം പ്രോത്സാഹിപ്പിക്കുന്നതിനായി ഏർപ്പെടുത്തിയ മൗലാന അബുൽ കലാം ആസാദ് സാക്ഷരതാ അവാർഡ് ഫറൂക്ക് കോളേജ് നേടി. കേന്ദ്ര സർക്കാരിന്റെ ദേശീയ കമ്മീഷൻ കോളേജിന് ന്യൂനപക്ഷ പദവി നൽകി. 2015-ൽ യു.ജി.സി. കോളേജിന് സ്വയംഭരണ പദവി നൽകി. MHRD, NIRF റാങ്കിംഗിൽ 100 സ്ഥാനങ്ങളിൽ കോളേജിനെ ഉൾപ്പെടുത്തി. 2020, 2021 റാങ്കിംഗ് ലിസ്റ്റിൽ ഈ സ്ഥാനം നിലനിർത്തി.